風山張 :
我係一個讀緊法律系嘅學生，讀到最尾嗰一年，我哋通常都要出去搵實習，實習半年之後返番學校。
搵實習係一場飢餓遊戲，唔係你死就我亡嘅大戰，乜嘢同窗之情，友誼乜乜乜乜，都可以抹晒佢。有實習唔代表你可以平步青雲，但冇實習就肯定只有死路一條。
今日我同我幾十個同學一齊去到mwc律師樓面試，mwc律師樓出名做房地產、訴訟遺產承辦同一般民事商業事務，係行內一間幾有信譽嘅律師樓，而且規模大，規模大即係多生意，多生意即係有機會有啲細野比實習生做。所以我哋一行十幾人全部戰鬥格咁上到去mwc律師樓。
2.
mwc律師樓喺中環德輔道中141號中保集團大廈，一入到去已經有好多其他大學嘅學生喺度等緊面試，仲有幾個外籍學生，我探頭睇睇入邊，面試嘅竟然係mwc律師樓其中幾個主要嘅律師，我心諗，今次仆街啦，律師會親自出嚟揀見習生，即係代表佢好想有人跟住佢，自己親自揀徒弟啊。通常呢啲面試都會好刁鑽，考下你究竟有幾多實力，同睇吓你真正嘅意向，究竟係想做一個民事訴訟嘅律師，定係刑事等等，有時候當下嘅依個決定，就好影響你之後嘅職業生涯，所以一定要坦白。
11.
我接過手頭上嘅文件，估唔到我係麥黃張律師樓嘅第一份工作，就係做逆權侵佔。
逆權侵佔，係指房地產非業主不經原業主同意，持續佔用對方土地超過一定時限，原業主訴訟時間終止，佔用者可以成為土地嘅合法新業主，不必付出任何代價。逆權侵佔嘅案例，亦都係麥黃張律師樓最經常接到嘅生意。
逆權侵佔要符合敵意佔有嘅要素，如果佔有者相信業主容許佢合法進入該地，咁佔有意圖就唔成立。
12.
所謂逆權侵佔，一般時效為12年，零五年嗰時，有一單好出名嘅新聞，就是說一對母女持續佔用大埔一片農地超過20年，結果得到該地段業權，個地原本屬於恆基地產，就係因為逆權侵佔，所以判咗個兩母女勝訴。
麥黃張律師樓有一間好大嘅房，間房仲大過老細房，入邊全部都係60幾年來，麥黃張律師樓接過的案例，亦係我長期打躉嘅地方。
我做晒所有資料蒐集，判我哋勝訴嘅機會好大，律師樓嘅風格一向都穩打穩扎，稍微有少少錢，但又想贏官司嘅，都會搵我地。
我做晒功課，將啲嘢交咗比麥律師，麥律師望咗一眼，「你覺得你咁樣做嘢，就可以繼續留喺我哋麥黃張律師樓咩？」
我好驚，我唔知自己做錯啲乜嘢，麥律師一手將文件俾返我。
「你連你個客都冇見過，你點有資格做律師，我點可以俾你代表我地麥黃張律師樓。」
我又驚又喜，估唔到我有機會可以跟到客人，我即刻出返去，準備見客嘅功夫。
今次嘅按例非常典型，一戶姓李嘅家人，上一代嘅時候將間屋借咗俾一個冇屋住嘅親戚，個親戚一路住到而家，到上一代都死埋啦，佢哋嘅仔女先發現原來嗰間屋原本係屬於自己爸爸嘅，咁就想收返間屋，但個親戚就用逆權侵佔嘅方法，想得到依間屋嘅擁有權。今次嘅任務，就係將間屋收返返嚟。
我去到李氏嘅屋企，佢屋企住喺赤柱嗰啲獨立屋，有司機有管家，我嚟到，坐咗喺佢哋個好靚嘅大廳度，個管家打咗個內線電話
「麥黃張律師樓嘅人到咗」
等左一陣，出嚟嘅人係一個年約30歲嘅男人，典型嘅有錢佬樣，佢一見到我，就皺唒眉頭，「乜而家麥黃張律師樓搵啲咁嘅人黎見我」
佢就好似電視入邊典型嘅有錢人一樣，完全睇唔起人，但當然，我都唔敢得罪佢。
「其實我今日嚟到，都係代表返麥黃張律師樓，補問你小小問題」
佢點起左支雪茄，「問啦。」
- This is a declared original article, to respect the copyright, please do not repost this article without the consent of the author.
- Keywords : 律師樓, 麥黃, 逆權侵佔, 就係, 嚟到, 係麥黃, 估唔到, 點可以俾, 麥律師一手, 麥律師, 面試嘅, 零五年嗰, 雪茄, 錢佬樣, 錢人一樣, 農地超過, 資格做律師, 資料蒐集, 該地段業權, 規模大